Nagahingyo karon ang mga game fowl breeders sa Negros Occidental nga ibalik na ang bulang agud indi na magdaku ang pierde sa tunga sang COVID-19 pandemic.
Sa interview sang RMN ginpahayag ni Barangay Sta. Cruz, Murcia Punong Barangay Boy Gravino, ginpalab-ot sini sa gobyerno nga kon tani ibalik na ang bulang bisan sa 50% lang nga kapasidad sang mga bulangan para amat amat nga makabawi ang mga tag-iya kag trabahador sang manokan.
Ang nasambit nga barangay sa banwa sang Murcia ang isa sa mga lugar sa probinsya nga madamo sang game fowl breeders kon sa diin kapon 300 hectares sang duta ang ginaakupar sini.
Sang nagsugod ang pandemic, wala na ginapahanugutan ang bulang. Sa Barangay Sta. Cruz pa lang, 400 ang mga nagatrabaho sa mga manukan.
Suno naman kay Provincial Veterenarian Renante Decena, ila na ginatugyan sa Games and Amusement Board ang pag-ayo sa National Inter-Agency Task Force sa pagpabalik sang mga bulang.
Gin-aku man sang opisyal nga indi lang breeders ang apektado sa pagpauntat sang bulang pati man ang mga empleyado kag kumpaniya nga nagabaligya sang feeds.
Dugang pa sini nga nagadangat sa P4 to P5 billion ang tax nga ginabaton sang gobyerno gikan sa bulang sa probinsya.
Nahibalu-an nga may kapin 7 million ang populasyon sang manok sa Negros Occidental kag 4 million diri ang sa game fowl.
