Taliwala sa pandemya diin gibawal ang mga dagkung panagtapok sa Marawi City, gipaningkamutan pa gihapon sa pipila ka mga opisyal sa gobyerno, sa Armed Forces of the Philippines ug sa Philippine National Police nga magtapok aron saluduhan ug handumon ang mga sundalo ug mga pulis kinsa namatay niadtong Marawi siege sa tuig 2017.
Sa ikatulo ka tuig nga komemorasyon sa Liberation of Marawi niadtong Sabado, Oktubre 17, subling nadungog ang mga buto sa armas, dili tungod kay aduna na usay giyera, apan tungod kay nagpahigayon og 24-gun salute alang sa 168 ka mga sundalo ug pulis kinsa namatay samtang nakig-away sa mga terorista aron mabawi ang Marawi City.
Mga dagkung wreath o bulak ang subling gihalad sa heroes’ wall, diin nakasulat ang mga pangalan sa mga sundalo ug mga pulis, nga gipatindog sulod sa kampo sa 103rd Infantry Brigade.
Gipangunahan ni AFP Chief of Staff Gilbert Gapay ug Marawi Mayor Majul Gandamra ang nasangpit nga selebrasyon.
Miingon si Gapay nga bisan nahuman na ang kagubot sa Marawi City, magpadayon ang AFP sa pagtabang aron mamintinar ang kalinaw sa dapit.
Miingon usab si Gandamra, nga dili malimtan sa mga Maranaw sa Marawi City ang gihimong pagsakripisyo sa mga namatay aron lang mabawi ang ilang dapit gikan sa mga terorista. (October 19)
