Subling namahayag ang Moro Islamic Liberation Front o MILF ang saad niini nga mamahimong prayoridad sa Bangsamoro government ang rehabilitasyon sa Marawi City.
Sa usa ka media forum sa Marawi City nga gipasiugdahan sa Marawi Broadcasters Association, miingon si Dr. Marjani Mimbantas, kinsa nag-representar sa MILF, nga ang Marawi rehabilitation anaa sa ikaunom sa mga prayoridad sa MILF sa higayon nga ma-ratify ang BOL.
Nagtoo si Mimbantas nga nahitabo ang Marawi siege tungod sa pakyas nga pangandoy sa katawhan Moro human sa sunod-sunod nga kapakyasan sa ilang gipangayo nga utonomiya.
Miingon si Mimbantas nga sukad pa sa Tripoli Agreement hangtud sa pagpirma sa Comprehensive Agreement on the Bangsamoro o CAB ug sa deliberasyon sa Bangsamoro Basic Law (BBL) sa 16th Congress nga wala napasa, daghan sa katawhang Moro ang gibati nga napasagdan na sila.
Kung mapatuman na, matud pa, ang BOL, ang mga rebeldeng grupo mawad-an na og rason aron sila magpadayon sa ilang mga kalihukan.
Sa pikas nga bahin, si Bangsamoro Transition Commission (BTC) Commissioner Ammal Solaiman mipadayag sa ilang kumpiyansa nga ang maoy BOL kasiguruhan nga wala nay mobanaw nga dugo ug mawagtang na ang kagubot u gang sama sa Marawi siege dili na mahitabo pag-usab.
Sama sa gipamahayag ni MILF Chairman Ghadzali Jaafar nga ang BOL usa ka antidote sa violent extremism tungod kay adunay mga pprobisyon sa BOL nga makatabang sa Marawi City aron kini mobangon pag-usab nga malinawon.
Ang MILF aktibo nga misalmot sa information dissemination kabahin sa BOL sa nagkalain-laing dapit sa Mindanao samtang nagkaduol ang plebisito.
Ipahigayon kini sa mga probinsiya sa Autonomous Region in Muslim Mindanao o ARMM ug sa mga lugar nga nag-petisyon sa Commission on Elections (COMELEC) aron ipaabot ang ilang interes nga magpasakop sa bag-ong Bangsamoro Autonomous Region in Muslim Mindanao (BARMM).
