Tungod sa padayon nga pagtaas sa ihap sa mga indibiduwal nga posibleng adunay COVID-19, gipailawom na usab sugod ganinang alas-12:01 ganinang kadlawon sa community quarantine ang Lanao del Sur ug Marawi City.
Kini human nga misaka na sa siyam ang mga patient under investigation o PUIs sa lalawigan, diin ang unom niini gi-isolate karon sa Amai Pakpak Medical Center sa Marawi City, ug ang tulo nagatago.
Aduna usay na-record nga 75 ka mga persons under monitoring o PUM sa probinsiya.
Sa joint executive order number 001, series of 2020, nga gipirmahan nila ni provincial governor Mamintal Adiong, Jr., ug Mayor Majul Gandamra, gilimitahan niini ang mga mosulod sa probinsiya ilabina kung dili importante ang tuyo didto.
Sama sa ubang mga dapit nga nagpatuman og community quarantine, ang mga pasahero’ng mosulod sa probinsiya kinahanglang magpa-record sa mga checkpoints nga gipahimutang sa mga entry points sa lalawigan.
Ang mga checkpoints anaa sa Saguiaran, Kapatagan, Maguing ug Picong.
Kinahanglan nilang motuman sa mga guidelines nga gilatag sa Task Force COVID-19 aron sila makasulod sa Lanao del Sur ug Marawi City.
Ang dili motuman niini, dili ipasulod o kaha ipa-agi.
Kung kahinumduman nga taga Lanao del Sur ang labing unang namatay sa COVID-19 sa Mindanao.
Sa 12 ka mga namatay sa maong virus sa tibook nasud, tulo kanila mga Meranao.
Molungtad ang community quarantine sa Marawi City ug Lanao del Sur hangtud sa Abril 14. (Divina M. Suson, March 17)
