Davao City – Plano karon ni Davao City Mayor Sara Duterte-Carpio nga himoong COVID-19 isolation facility ang Marco Polo Hotel sa syudad human gi-anunsyo sa mga tagdumala niini nga ilang gi-undang ang operasyon niini human naapektohan sa COVID-19 crisis karon.
Sumala ni Duterte, wala pa siya makadawat og opisyal nga pamahayag sa hotel owners apan nasayud na siya sa plano kabahin niini.
Giklaro sa Mayor nga mananghid pa siya sa management sa maong pamatigayon kung mosugot ba sila nga himoon kining quarantine facility alang sa mga COVID patients.
“I wonder kung musugot ang Marco Polo Davao (nga) mahimong quarantine facility…mangutana ta,” segun sa alkalde.
Nangandam karon ang LGU-Davao sa kamugnaan sa mga quarantine facilities gumikan sa posibleng pagdagsa sa mga pasyente sa maong balatian.
Sa pagkakaron, aduna nay 14 ka mga quarantine facilities sa atong lokalidad gilangkuban sa kapin 600 ka mga beds (kama).
Subay sa rekomendasyon sa mga doktor, gikinahanglang adunay 1,000-bed capacity ang dakbayan aron kabutangan sa mga local COVID-19 patients.
RadyoMaN Aimee Guinita
