Davao City – Nabuhi na usab ang paglaum sa mga Dabawenyo human nga personal nga nagkakita si Davao City Mayor Sara Duterte-Carpio ug presidential aspirant ug kanhi senador Ferdinand ‘Bongbong’ Marcos Jr.
Niadtong Sabado (October 23, 2021) sa dihang gikumpirma ni Duterte-Carpio sa iyang official Facebook page ang ilang paghimamat ni Marcos sa Cebu City human sila giimbita sa birthday ni Congressman Yedda, asawa ni House Majority Leader Martin Romualdez.
Adunay mga hungihong nga dako ang posibilidad nga nagkaistorya ang duha mahitugod sa 2022 Elections, apan kini wala gikumpirma ni Mayor Sara.
“Confirmed po na nagkita kami ngayon lang ni Presidential aspirant at former Senator BBM sa masayang pagdiriwang ng birthday ni Cong. Yedda, maybahay ni House Majority Leader Martin Romualdez sa Cebu,” Facebook post sa alkalde.
Kumento sa netizen ug Dabawenyo nga si Hezekiah King Cañosa, suportado niya ang duha ka politiko bisan og kinsa pa kanila ang mag-presidente ug mag-bise presidente.
“Finally, the long wait is over! Kahit sino sa inyo basta magtandem lang kayo! BBM-Duterte / Duterte-BBM,” kumento nini sa Facebook.
Sa pagkakaron, nagpabiling mukandidato si Mayor Sara sa ikatulong termino isip alkalde sa Davao apan giatangan gihapon sa supporters sa presidential daughter nga aduna pay mahitabo hangtud Nobyembre 15, 2021 diin gitugotan sa Commission on Elections (COMELEC) ang withdrawal ug substitution sa mga kandidato.
RadyoMaN Kirby Manzon
