Davao City – Mayoriya sa mga lungsuranon sa Davao dakung uyon sa pagpabalik ni Pres. Rodrigo Duterte kang suspended Criminal Investigation & Detection Group (CIDG) director Supt. Marvin Marcos kinsa giakusahang maoy responsable sa kamatayon sa arestadong drug personality nga si Albuera Leyte Mayor Rolando Espinosa, Sr.
Si Espinosa ug lain pang inmate nga si Raul Yap gituhuang gipatay sa mga operatiba sa kapulisan sa Eastern Visayas samtang gikustodiya sa Leyte Provincial Jail extension sa Baybay City.
Matud ni Akbayan Partylist Rep.Tom Villarin sa programang RMN Straight to the Point, angay unta nga gilikayan sa presidente ang pagnombra pag-usab kang Marcos sa pagpanerbisyo sanglit ang mga imbestigasyon nga gihimo sa Espinosa gunslaying incident nagpakita sa posibleng tulubagon niya sa nasangpit nga kamatay.
Gibarugan ni Villarin nga dili lamang kini isyung legal kon dili usa usab kini ka hisgotanang moral hinungdan nga angay unta nga ikapakita sa Duterte administration ang katakos ug kaisog niini nga sipa-on ang tanang mga salawayong pulis kun mga ‘police scalawags.’
Sa iyang kabahin, gibutyag ni Dante Jimenez, convenor sa grupong Volunteers Against Crime and Corruption (VACC) nga samtang dili pa kumbiktado ang usaka tawo pinaagi sa pinal nga hukom sa korte, tawgon sa gihapon siya nga usaka suspetsado diin angay lamang siyang hatagan sa higayon nga depensahan ang iyang kaugalingon.
Pikas bahin, duda usab sila si Davao journalist Serafin ‘Jun’ Ledesma ug Arthur Tariman, convenor sa grupong Victims of Injustice, Criminality and Terrorism in Mindanao sa matuod nga rason sa Marcos reassignment. Matud sa duruha ka mga panelists, malagmit nga makaapekto kini sa imahe sa atong nasudnong kapulisan gumikan sa perception nga ‘kids glove treatment’ kun ‘special treatment’ ngadto sa nasangpit nga police officer ug sa 18 niya ka mga kakaubanan kun mga hinanib.
Kasamang June Duterte
tags: Mindanao, Davao City, DXDC, DXDC621, Straight to the Point, June Duterte
