Davao City – Dakung uyon ang usaka iladong lider nga taga-Mindanao sa ideya nga tapuson kun i-lift na sa hingpit ang martial law declaration sa tibuok isla sa Mindanao.
Sa pakighinabi kaniya sa morning primetime radio social commentary program nga ‘Straight to the Point,’ gipaambit ni former Senate President Aquilino ‘Nene’ Pimentel, Jr. nga mas makaayo sa habagatan nga ma-normalisa na ang atong estado karon nga neutralisado na ang duruha ka mga dagkung lideres sa bandidong pundok nga Maute-ISIS-Daesh nga sila si Omar Khayyam Maute ug ISIS emir Isnilon Hapilon.
Kagahapon, mismong si Pangulong Rodrigo Duterte ni-anunsyo sa iyang diskurso sa Marawi City nga luwas kun liberated na kini gikan sa pagpanghasi sa bandidong hut-ong sulod sa lima ka bulan.
Apan sahi ang barug sa mga eksperto sa nasudnong seguridad: Ang reconstruction o rebuilding sa Islamic Capital matigayon lamang kun gi-imposar pa ang balaud-militar ilabi diha sa paggukod sa mga personalidad nga buot manabotahe niini.
Gawas pa niana, gikabalak-an usab ang sitwasyong ‘terror spillover’ sa pipila ka mga dapit sa Mindanao sama sa Basilan ug Zamboanga Peninsula diin naggikan ang Abu Sayyaf, ang lokalidad sa Maguindanao ug Sarangani diin anaa ang presensya sa Ansar al-Khalifa ug ang Kabisay-an diin sa orihinal nga plano sa Maute buot nila kining himoong expansion area.
Panapos pa ni Pimentel, mas makaayo sa nasud kun lifted na ang martial rule ilabi na haron mobalik ang kumpyansa sa mga ‘prospective investors’ nga mobubo sa ilang negosyo ug capital dinhi sa ato sa Mindanao.
RadyoMan June Duterte
