Davao City – Walay nakita nga rason ang Sentro Labor Organization for Global aron lugwayan pa og laing usa ka tuig ang pagpatuman og martial law dinhi sa Mindanao sunod tuig.
Gibatbat ni Sentro Labor for Global Secretary-General Joshua Mata nga wala nay basihan si Pres. Rodrigo Duterte aron lugyawan pa ang balaud-militar dinhi sa Mindanao sa tibuok 2018.
Gipunto ni Mata ang natapos nga Marawi siege ug gani gawasnon na ang maong siyudad gikan sa hulga sa terorismo nunot sa atake sa teroristang Maute group human sa lima ka bulan nga binakbakay.
Dili kuntento si Mata sa gipunting nga rason ni Pangulong Duterte nga hulga sa seguridad sa Mindanao ang pinaka-hinungdanan ngano buot niini malugwayan pa og usa ka tuig ang martial law sa yutang saad.
Ug labaw na nga dili kini kumbinsido nga dakong ikatabang sa rehabilitasyon sa Islamic City ang balaod militar sanglit igo na ang dakong suporta sa gobyerno sa pagtukod pag-usab sa Marawi.
Wala gikunsidera sa Secretary General ang mga teroristang grupo sama sa CPP-NPA-NDF nga dakong hulga sa seguridad sa Mindanao.
Inay gigamit lang kini nga katarungan sa gobyerno aron kumbinsihon ang kongreso nga paundayonan si Duterte sa iyang plano nga extension sa martial law nga mahuman unta sa 31 karong bulana.
Nagpahimangno si Mata sa katawhan nga mag-igmat kay ang extension sa martial law parte kuno sa damgo ni Pangulong Duterte nga magdeklara og balaod militar sa tibuok Pilipinas sanglit sa kampanya mao kini ang mabate sa parte sa diskurso sa pamuno-nasud.
RadyoMaN Joel Viray
