Davao City – Dili angay malisang ang katawhang Pilipino ugaling magdeklara og nationwide martial law ang presenteng panggamhan sa katarungan nga ang lutoson lamang niini mao kadtong mga teroristang grupo ug grupo sa mga kriminal nga maoy responsabli sa mga pagpamomba ug kriminalidad sa nasud.
Segun ni criminal law practitioner Leonard Cagatin, ang mga sundalo ug kapulisan karon pulos na propesyonal ug dagku na usab sila og sweldo ug benepisyo matag bulan dili sama kaniadto busa walay rason mangabuso pa sila ugaling mapailawom sa balaud militar ang tibuok-Pilipinas.
Ug kung mapatuman lamang sa ensakto sa armadong kusog ug sa kapulisan ang martial law makalaum ang katawhan nga dili na masubli ang mapait nga kagahapon sa panahon dihang gipaubos ang Pilipinas sa balaud-militar sa panahon sa rehimeng Marcos diin grabe ang pangabuso sa AFP ug sa CPP-NPA-NDFP kapin tulo na ka dekada ang nakalabay.
Ug labaw nang walay angay ikabalaka ang mga Pilipino sa nationwide martial law kay ubos sa 1987 Constitution, ang civilian authority pa gihapon ang mopatigbabaw diin ang Kongreso ug Senado adunay tingog sa matag sayop nga mahimo sa tropa sa kagamhanan.
Sa pagkakaron, nakita ni Cagatin ang panginahanglon sa nationwide martial law sanglit wala na’y lain nga medyos aron masanta na ang pag-atake sa mga teroristang grupo sama sa Ajang-Ajang group sa Abu Sayyaf aron hingpit na nga ma-establisar ang kalinaw nga maoy damgo sa tanan.
Giklaro ni Cagatin nga andam niya suportahan ang nationwide martial law kung kini man lang ang makasanta sa mga terorista ug maprotektahan ang katawhang Pilipino gikan sa nilu-og nga binuhatan sa mga kalaban sa gobyerno.
RadyoMaN Joel Viray
