Davao City – Dismayado si Pres. Rodrigo Duterte sa Philippine Charity Sweepstakes Office (PCSO) gumikan sa walay puas ug grabe nga kurapsiyon nga nahitabo sulod sa nasangpit nga ahensiya.
Mao kini ang rason kun nganong gimando niini niadtong Sabado sa gabii nga ipahunong ang operasyon sa mga lotto outlets nga gipasugdahan mismo sa PCSO ug lakip na ang Small Town Lottery kun STL outlets, ‘Peryahan ng Bayan,’ ug Keno Stalls nga gitugotan nga maka-operate sa tibuok sa nasud.
Apan hugot nga gidepensahan ni Games and Amusement Boards (GAB) Commissioner Mar Masanguid ang nahimong desisyon si Presidente Duterte diha sa pagdeklara nga ilegal na ang maong mga sugal dungan pagpahunong sa operasyon sa tibuok Pilipinas.
Matud ni Masanguid, angay respetohon ang kalaam ni Duterte kay alang lang kini sa pagahimoong imbestigasyon batok sa pipila ka mga opisyales nga anaa sa likod sa pagpangawkaw sa pondo sa PCSO.
Samtang si PCSO Board Member Sandra Cam mi-apelar usab sa katawhan ilabi na sa mga kabus nga maoy benepisaryo sa mga programa nga sabton ang kinaadman ni Duterte gumikan sa isyung kurapsiyon nga niigo sa PCSO karon.
Subay sa datos gikan sa nasudnong kapulisan, kapin 5,000 lotto outlets, kapin 13,000 STL, kapin 2,000 ‘Peryahan ng Bayan’ ug dul-an 500 ka Kenos kun kapin 20,000 ka gaming outlets sa tibuok nasud hingpit nang nasirad-an of as alas-12:00 gahapon sa udto.
Niini, dul-an 200,000 ka mga sales agents, online lottery retailers, field sales representatives kun ‘cobrador’ ug Field Sales Supervisors kun ‘cabos’ ang mawad-an og trabaho sugod niadtong Sabado sa gabii.
Ang labaw nga maapektohan ug makaluluoy sa kamandoan sa gobyerno karon mao ang nilibo ka mga kabus kinsa walay kapasidad makabayad sa ospital ug ang bugtong maduolan alang sa medical assistance aron dili ma-hostage ang ilang mga pasyente mao ang PCSO.
Sa record niadtong 2016, ang PCSO nagtagana og P9.8B nga disbursement alang sa Individual Medical Assistance Program kun IMAP, Employees Medical Assistance Program kun EMAP ug Endowment Fund kun dunay pag-usbaw nga 9% itandi sa 2015 nga P8B.
Flagship program ang Individual Medical Assistance Program ubos sa Medical Assistance and Service Program sa PCSO diin ang mga tawo nga dili makabayad sa pampubliko ug pribadong ospital makadawat og ayuda gawas sa benepisyo sa Philhealth ug tabang gikan sa DSWD.
Apan nagtoo si Masanguid nga temporaryo lamang ang kamandoan sa pamuno-nasud ug kung mahuman na unya ang imbestigasyon ug kun aduna na’y masilotan ug mapasakaan og kasong pagpangawkaw, hayan imando ra usab niini ang pagbalik sa operasyon sa mga legal nga pasugal sa PCSO.
Kampante ang maong opisyal nga mas palapdan pa karon sa administrasyong Duterte ang iyang pagtabang ngadto sa mga Pilipino nga manginahanglan og medical assistance aron dili mabutang sa alanganin ang mga nagpa-dialysis, chemotherapy, mga na-ospital ug daghan pang uban karon nga dili pa sila makaduol sa PCSO.
Nanganti ang kanhi kapitan sa Barangay R. Castillo nga ilang pangsikupon ang bisan kinsang sekretong magpadayon og operate sa mga pasugal sa PCSO hangtud dili bakwion ang deklarasyon sa presidente.
RadyoMaN Joel Viray
