Gikoronahang Miss Cagayan de Oro 2019 ang 23 anyos nga Mass Communications Cum Laude graduate nga si Cinderella Faye Obeñita nga taga Barangay Carmen ning syudad.
Gipahigayon ang coronation night niadtong Sabado sa Limketkai Atrium, isip usa sa highlight sa Higalaay Festival 2019 nga kabahin sa kapistahan ni Senior San Agustin ning dakbayan.
Sugod pa lamang sa beauty pageant mihakot na sa dose ka minor, corporate ug major awards ang nasangpit nga Liceo de Cagayan University graduate, kinsa nag-adbokasiya batok sa Cervical Cancer aron matabangan kadtong mga kababaihan nga nakaangkon sa ingon niini nga sakit.
Nahimong 1st Runner Up si Nicole Ramos; 2nd Runner Up si Pauline Pielago; 3rd Runner Up si Vincy Vacalares ug 4th Runner Up si Souarthizae Violon.
Tungod niini, emosyonal usab nga gi-turnover ni 2019 Miss Cagayan de Oro Mary Chris Suico ang iyang korona ug nagpasalamat sa mga tawong misuporta ug nagpaluyo sa iyang kalampusan.
Mahinumdoman nga ang Miss Cagayan de Oro 2019 pageant gipasiugdahan ni Ms. Mags Cue, Kapitan Gigi Go sa JCI Bai Lawanen, lokal nga kagamhanan sa syudad ug mga pribadong kompanya.
