Davao City – Walay nakita nga sayop o dautan si Davao City Health Office (CHO) Head Dr. Josephine Villafuerte sa sugyot nga ipailawom ang tanang Pilipino sa COVID-19 massive testing.
Sa maong paagi, mas mapadali ang pagsuta kung kinsa ang adunay simptomas sa virus aron sa ingon mapasayon unya ang pagsumpo sa dugang pagkuyanap sa balatian dinhi sa atong nasud, segun ni Villafuerte.
Apan sa kanunay, magdepende gihapon ang kagamhanan sa available nga pundo nga puwedeng magamit diha sa pagpalit og testing kits aron mahitabo ang mass testing sa tibuok Pilipinas.
Ug kung may igong kapasidad man ang gobyerno, nagkinahanglan gihapon og approval gikan sa Food and Drug Administration (FDA) ang testing kits enforcement una pa man magamit kun gamiton alang ngadto sa katawhan.
Giingon usab ni Villafuerte nga angay lamang maggahin og pundo ang gobyerno sa testing aron mapukan dayon sa hinanali nga panahon COVID-19 kay naaapeko na kini pag-ayo sa ekonomiya ug sa minilyon ka mga Pinoy.
Sa pagkakaron, ang gibuhat sa mga awtoridad sa panglawas mao ang pagkab-ot sa mga detalye sa mga nag-positibo nga maoy gihimong basehan sa contact tracing sa mga indibidwal nga nahalubilo sa mga nagkasakit na.
Gi-rekomendar ni Villafuerte ang mass survey ngadto sa mga barangay aron matumbok dayon kung kinsa kadtong nataptan alang sa hinanaling aksyong medikal sa mga na-exposed sa COVID-19.
RadyoMaN Joel Viray
