Davao City – Gibantayan karon sa mga pulis sulod sa Southern Philippines Medical Center (SPMC) ang amahan kinsa nidunggab sa iyang upat ka mga anak samtang padayon pa kining ginatambalan.
Matud ni Island Garden City of Samal OIC PSupt. Giuffeppe Geralde kanunay ang ilang koordinasyon sa mga doktor sa kondisyon karon sa suspetsadong si Joel Nonoy.
Gibutyag ni Geralde nga karong Lunes gikatakda nilang iduso ngadto sa korte ang kasong multiple parricide ug frustrated parricide batok sa 38 anyos nga suspek.
Wala na maluwas pa ang tulo niini ka mga anak kinsa gisulayan pa’g dala sa balay tambalanan.
Nakahiagom og mga samad dinunggaban sa ilang kalawasan ang 13 anyos, 11 anyos ug 7 anyos nga manag-igsuon samtang nagpaalim pa ang ilang 4 anyos nga kinamanghuran.
Alas-11:00 sa kagabhi-on nahitabo ang krimen sulod sa ilang panimalay sa Purok 1, Brgy. San Isidro, Babak District, IGACOS.
Sa imbestigasyon nigula nga giingong ang pagbiya sa asawa niini ug away-magtiayon ang nakatukmod sa maong suspek nga pangdunggabon ang ilang mga anak gamit ang usa ka kutsilyo.
Sumala ni Geralde walay rekord sa prisohan kaniadto ang suspek lakip sa droga.
RadyoMaN Aimee Guinita
