Relatao asegun na su trabajo como un pulis el muerte de Police Officer 3 Michael Tan con quien ya liquida enantes madrogada el desconosidos riding tandem na vicinidad del Veterans Avenue, en este ciudad.
Na exclusivo entrevista del RMN Zamboanga enantes aga con el hefe del policia local Senior Superintendent Neri Vincent Ignacio, ele ya revela cay siendo designao na warrant section del Sta. Maria Police si PO3 Tan, manada este con quien ta fuede man-bangga personalidad por el servida del mandamiento de aresto, especialmente aura que ta revive otraves el policia con el intensificao campanya contra illegal droga na ciudad.
Si Ignacio ya abla cay parte ya del trabajo del un pulis el esta delicao el vida porcausa cay el mal-elementos que ta viola con el ley ta sale tambien agraviao.
Apelo de Ignacio con el mga vivientes si quien man ya fuede man testigo con el matanza con PO3 Tan, coopera canila na imbestigasyon para fuede dale justicia con el muerte del un servidor del fueblo.
Si PO3 Tan encamino ya pabolvida na su residencia na Sta. Catalina desdel su duty na presinto syete, ala-una pasada de enantes madrogada cuando ya llega na vicinidad del Sta. Cruz public market na Veterans avenue, ya tira coneste el riding tandem suspechao donde desfues ya abaha pa el backrider y ya rega pa otraves de bala con el victima antes ya escapa para na desconosido direccion.
El combinao fuerza del Presinto Syete y Presinto Onse ta conduci pa mas ondo imbestigaccion aserca este matansa con un otoridad. – *Bhong Simbajon/RMN News*
