Personal nga ginpadulongan ni anay AFP chief of staff kag karon DILG undersecretary, Eduardo Año ang mga pilason nga police kalakip ang napatay nga si Po1 Joefil Odon sa pagpang-ambush sang mga katapo sang npa sa banwa sang Maasin, Iloilo.
Dala ni Undersecretary Año ang maayo nga balita matapos ang mapait nga kapalaran sang kapulisan sa ambush.
Kaina, personal nga ginhatag ni Undersec. Año ang cash assistance sa mga nagkalapilasan nga police nga nagabalor 100 thousand pesos, cellphone, calling card ni Pres. Rodrigo Duterte kag talalupangdon man ang isa ka- cal. 45 pistol nga ginhatag sa mga wounded policemen bilang personal firearm sang mga ini, On or off duty.
Una diri ginpadulungan man ni Undersec. Año ang napatay nga si Po1 Joefil Odon kag ginhatagan ang ginikanan sini sang cheke nga nagabalor sang 250 thousand pesos, 168 thousand pesos halin naman sa philippine national police, cellphone kag calling card sang presidente.
Samtang kadungan sang paghatag sang armas luthang sa mga pilason nga mga police, ginhatagan pagtamod ni Año ang importansya sang panindugan sang mga kapulisan sa giyera kontra mga terorista.
