Target na maaprubahan sa ikatlo at huling pagbasa ang panukalang batas para sa pagtatatag ng Virology Institute of the Philippines (VIP) at Center for Disease and Control and Prevention (CDCP) mamayang hapon sa sesyon ng Kamara.
Kasunod ito ng pagbanggit at apela ni Pangulong Rodrigo Duterte sa kaniyang huling State of the Nation Address (SONA) na agad nang ipasa ng Kongreso ang dalawang mahalagang panukala na magpapalakas sa health capacity ng bansa ngayong may pandemya.
Kampante si Committee on Health Chairman Angelina ‘Helen’ Tan na agad mapapagtibay sa huling pagbasa ngayong araw ang House Bill 9559 at House Bill 9560 dahil mabilis lamang ding naaprubahan ang dalawang panukala sa ikalawang pagbasa.
Ang Virology Research Institute ay tututok sa detection at limitasyon sa pagkalat ng virus sa hayop, halaman at tao gayundin ang makalikha ng bakuna bilang long-term protection at gamot.
Samantala, ang CDCP naman ay sesentro sa pagpigil ng communicable o infectious disease.
