Mati City – Wala nagdahom ug gikasubo sa pamilya human naghikog ang sa usa ka mananagat, sa Sitio Malibago, Barangay Badas, Mati City, Davao Oriental gabii niadtong Huwebes (Marso 11, 2021) ug nakit-ang wala nay kinabuhi alas-10 sa buntag (Marso 12, 2021).
Sa interbyu sa DXDC RMN Davao kang Police Master Sergeant (PMSg) Jonathan Quieta, Mati City Municipal Police Station Investigator (MPS), giila ang biktima nga si Gellemer Rodriguez, 49-anyos, minyo, residente sa nahisgutang lugar.
Matud sa pulis, naghikog ang biktima gamit ang twine rope sa usa ka neem tree nga nahimutang sa bungtod sa usa ka bakanteng lote, 100 meters lang usab gikan sa ilang balay, ug ang usa sa anak niini ang nakakita sa iyang amahan.
Sa interbyu usab sa DXDC RMN Davao sa asawa sa biktima nga si Girlie, gibuyag niini nga nakainom nianang gabii ang iyang bana ug una kini nilakaw alas-8:30 sa gabii, gigakus ug gihalokan pa siya niini.
Matud ni Girlie, nag istorya pa sila sa iyang bana diin naghisgot kini nga gikapoy na siya labi na sa ilang sitwasyon nga nagbalhin-balhin og balay diin ika-upat na nilang balhin niadtong Domingo sa ilaha na untang kaugalingong lote, sa lugar asa usab kini naghikog.
“Nag istorya lang mi gumikan sa balay. Ingon ko, iuli gyud nato na. Gikapoy na daw siya’g guba unya balhin napud. Hunahuna niya, gikapoy na siguro siya. Managat pa man gud siya, ana. Unya wala man mi kabalo nga mag-suicide siya gabii (Marso 11, 2021),” saysay ni Girlie.
Nanawagan usab sila sa gobyerno nga matabangan aron mapahilona ang iyang bana, tungod usab sa kalisod sa ilang sitwasyon diin nasayrang unom (6) ang ilang mga anak.
RadyoMaN Kirby Manzon
