Davao City – Gipahimangnoan ang mga residente nga duol sa kasapaan sa Brgy. Matina Crossing ning syudad nga kanunay alerto ug mag igmat sa posibleng pagtaas sa level sa tubig tungod sa ulan nga dala ni bagyong Basyang.
Sa pakighinabi kang Brgy. Disaster Risk Reduction and Management Committee (BDRRMC) Matina Crossing Chief Reynante Luna sa tulumanong Kuskos Batikos, giingon niini nga padayon ang ilang pag-monitor sa duha ka sapa sa maong Brgy. mao ang Davao River ug Matina Pangi river.
Hangyo ni Luna ngadto sa mga residente nga og dunay himuon nga pre-emptive evacuation og ugaling mutaas ang tubig, mukoordinar gilayon ug dili na hulaton pa nga muabot sa kritikal level ang tubig aron wala nay maipit pa sa sitwasyon sama sa miaging pagbaha niadtong tuig 2011 nga mikalas og ubay-ubay ka mga kinabuhi.
Dugang niini nga og mahitabo man ang pagbakwit, mamahimong muadto sa UM nga skwelahan ang mga apektadong pamilya nga anaa duol sa Davao River samtang sa Brgy. Hall sa Matina Crossing mamahimong mubakwit ang mga residente nga nagpuyo duol sa Matina Pangi River.
Kahinumduman nga misulod ang Bagyong Basyang sa Philippine Area of Responsibility nga posibleng magdala og kusog nga ulan ug muresulta sa pagbaha dinhi sa syudad sama sa nahitabo sa Bagyong Vinta niadtong Disyembre tuig 2017 hinungdan nga nangandam ug alerto karon ang tanang response team.
RadyoMaN Renz Barbarona
