Isa sa pinaka-ginakahadlukan nga mythological creatures diri sa Pilipinas amo ang ginatawag nga aswang. Ang aswang kilala bilang isa ka shapeshifting monster ukon kabalo magtigbaylo sa ano man nga sahi sg sapat, parehas sg itum nga ido, pispis, kuring, baboy, kag madamo pa. Masami nga mga biktima sang aswang amo ang mga tawo partikular ang mga lapsag kag ang mga nagabusong kun sa diin ila guid paborito tungod daw parehas sang luto nga langka ini ila mapanimahu-an. Nangin bantog ang mga istorya parte sa aswang sa mga lugar sa Visayas partikular sa Capiz, Aklan ,Antique kag Iloilo. Pero sa aton moderno nga panahon, may yara pa bala sang ginatawag nga aswang?
Si Manang Lucy indi niya matuod nga ngalan, nagapati siya nga may ara sang aswang tungod siya mismo ang naka-eksperyensiya kun paano aswangon. Nagabaligya sang utan si Nang Lucy sa ila nga barangay kag amo ini ang gabuhi sang iya nga pamilya. Kada las tres sag kaagahon nagapangumpra si Nang Lucy. Masami gasakay siya sa depasahero nga jeep pakadto sa Libertad. Biyernes nga adlaw samtang gahulat sag jeep sa ila nga bangga, hinali na lang nga may nabatian siya nga may naghuni, “tik-tik-tik!”.
Gulpi lang siya nagbalikid tungod daw ara lang sa iya nga likod nagahalin ang huni. Nagpalanindog ang balahibo ni Nang Lucy indi tungod sang katugnaw kundi tungod sa kakulba nga nabatyagan. Hinali na lang nga may nagkalas-kalas sa kahilamunan, kag sa iya kakibot may nakita siya isa ka dako nga itum nga ido nga pula-pula ang mata kag may mga matalum nga unto nga nagalaway nga daw hana nga lumpatan siya. Maayo lang kay may naglabay nga jeep kag naghingagaw sakay si Nang Lucy. Pero sa iya nga pagbalikid liwat sa kahilamunan, indi na ido ang iya nakita kundi isa ka tigulang nga babahe nga nagatindog. Natingala ang iban nga mga pasahero kung naano si Nang Lucy kay nagapanglapsi ini kag hinali na lang nga nadulaan ini sangg animo.
Sang nakabugtaw siya yara na siya sa ospital kag didto niya nahibaluan nga duwa na siya gale kabulan nga nagabusong. Dako ang pasalamatan ni Nang Lucy sa Ginoo nga wala siya maano pati ang ginadala sini.
Isa lang sa mga madamo nga mga istorya ang natabo sa kay Nang Lucy. Sa kadamuon sang aton mga nabatian, ngaa wala sang mga ibedensiya nga makapamatuod nga may ara sang aswang. Ikaw Bes, nagapati ka bala nga may aswang? *Lingling Supsup*
