Davao City – Mamahimo pang makadala og mga guna o panglimpyo sa mga panteon karong semanaha kutob sunod semana ang mga tao una pa man ang soft deployment sa mga kapulisan karong Oktobre 30.
Pahimangno ni Davao City Police Office (DCPO) spokesperson P/Sr. Insp. Ma. Teresita Gaspan nga angay nga magatiman na og sayo ang matag pamilya sa mga lubnganan kay hugot nga ibawal gayod sa kapulisan ang mga hinagiban ug uban pang mga delikadong mga butang.
Saysay ni Gaspan, pang-imbarguhon sa entrada pa lang ang mga ilimnon, speakers, baraha ug uban pang mga makaisturbo sa aktibidad sa Kalag-kalag.
Gani naka full alert ang mga awtoridad hangtod na sa Nobyembre 4 ug ‘No Leave Policy’ usab sila.
Magmontar usab og mga police assistance desks ang DCPO sa tanang mga pribado ug pampublikong mga sam-ang dinhi sa syudad.
Segun ni Gaspan nga 24/7 nga magbantay ang mga daghang ihap sa mga pulis sa mga sementeryo ug aron masiguradong tunhay ang paghinumdom sa Todos Los Santos ug adlaw sa mga minatay.
Aron dili usab mahatagan og higayon ang mga kawatan nga mu-atake sa mga panimalay samtang walay tao, likayan ang pag-anunsyo sa social media.
RadyoMaN Aimee Guinita
