Davao City – Simple ra nga kwalipikasyon ang gusto ni National Youth Commission (NYC) Davao Region Head Julius Gutierrez alang sa tanang buot mupapili sa Barangay ug Sangguniang Kabataang Election karong Mayo 14 ning tuiga.
Ang gusto ni Gutierrez nga kwalipikasyon alang sa tanang managan sa barangay mao nga Pilipino ug nagpuyo sa usa ka lugar sulod sa usa ka tuig o lampas pa niana.
Kinahanglan sab makamao musuwat ug mubasa ug walay salawayong binuhatan ug maayo ang record sa katilingban.
Mao kining matanga sa hiyas sa mga kandidato angay hatagan og kahigayonan makalingkod sa barangay ug makaserbisyo sa katawhan, matud ni Gutierrez.
Segun ni Gutierrez nga importante usab alang kaniya nga dunay igong kahibalo sa good governance, ug makamao sab magdumala sa meetings ug pagtratar sa gipasa nga mga resolusyon.
Dugang pa niini, gikinahanglan dunay ethics ang aspiring candidate ug mahigugmaon sa transparent nga mga transaksyon ug mga proyekto sa gobyerno alang sa barangay.
Mahinungdanon sab nga anaa sa kasingkasing sa usaka kandidato ang pagprayoridad sa pagserbisyo sa mga tawo ug pagpanday og mga ordinansa nga direktang makabenepisyo sa katawhan.
Giingon ni Gutierrez nga ang labaw’ng gikinahanglan sa katawhan karon kadtong mga kandidato nga andam mubuhos sa iyang talento alang sa kaayohan ug ikaayo sa alagarang barangay.
Sa katapusan, gihagit ni Gutierrez ang mga politiko sa barangay kinsa sakop sa political dynasty nga dili magsabay og dagan sa piniliay karong Mayo 14 kay daku kining kalapasan sa balaud sa Pilipinas.
RadyoMaN Joel Viray
