Roxas City, Capiz- Ginpanindogan ni Sports and Business Consultant Mrs. Carmen Andrade nga may yara sang nagakaigo nga rasun kon ngaa ginapabalik na sang provincial government ang gindonar anay nga lote sa barangay sang Tiza sa tiun sang administrasyon ni former Governor kag subong Pontevedra Mayor Estevan “Dodoy” Contreras.
Suno kay Andrade, yara nakapagkit sa deed of donation nga dapat ibalik sang recipient ang lote sa tion nga wala na ini ginagamit sa edipisyo nga ginkasugtan nga igapatindog nga amo ang barangay hall.
Nahibaloan nga sa subong, nagaserbe na nga day care center kag opisina sang mga senior citizens ang amo nga building.
Gindugang ni Andrade nga yara man nakapagkit sa deed of donation nga sa tion nga indi na matuman ang amo nga kondisyon nagakaigo nga ibalik ini sang barangay council nga wala sang anuman nga aksyon halin sa provincial government.
Samtang mabaskog naman nga ginpanindogan ni Punong Barangay Alfredo “Menong” Albaladejo nga ang korte gid lamang ang makadesisyon kun bala kinahanglan gid man nila nga ibalik ang duta nga gindonar na sang provincial government sa idalom sang nakaligad pa nga administrasyon.
Nahibaluan nga nagdihon na sang resolusyon ang barangay council nga nagapalab-ot sa provincial government sang ila panindogan nga wala sang may nabayolar nga kondisyon ang mga ini bangod nakatigayon naman sila sa pagpatindog sang barangay hall sa panahon nga nakapagkit sa deed of donation.
