Davao City – Suportado sa usa sa mga kapitan dinhi sa dakbayan sa Davao ang gikatakdang barangay ug Sangguniang Kabataan (SK) elections karong May 14, 2018.
Segun ni Brgy. 9-A Kapitan Roderico Llubit nga mas maayo nga madayon na gayod ang eleksyon karong tuiga aron nga mailisan na kadtong mga wala gayuy klaro ang trabaho ug igo lamang nga mudawat og honorarium sa barangay.
Pinaagi usab sa maong eleksyon matagaan og higayon nga makapili ang katawhan og sakto nga mga kandidato nga angay ibutang sa pwesto ug tinud-anay ang ilang itunol nga serbisyo ngadto sa katawhan.
Sumala ni Llubit nga kinahanglan gayod nga idayon ni Pres. Rodrigo Duterte ang barangay elections aron matanggal na usab kadtong mga kapitan ug mga opisyal sa barangay nga nalambigit sa iligal nga droga.
Alang sa kapitan nga mas labing maayo hinuon nga madayon ang eleksyon ubos sa balaod militar tungod kay mas napahugtan pa ang seguridad dinhi sa Mindanao.
RadyoMaN Aimee Guinita
