Iloilo – Nag-apelar subong sang bulig kag pangamuyo ang pamilya sang isa ka Ilonggo nga seaman nga missing sa barko sini nga ginasakyan samtang nagalayag padulong sa Taiwan alas sais sang gab-i sang Disyembre 25.
Si Lude Mar Legario, 25-anyos nga sakay sa M/T Songa Breeze ang nareport nga missing sa ginasakyan nga barko mga 100 milya ang kalayuon sa Northern Palawan.
Ulihi nga nakit-an si Lude Mar sa kilid sang barko nga nagapahangin-hangin.
Nagpatunog pa sang alarma ang kapitan sang barko pagkatapos nga nadula ang biktima kag nagpangayo man ang mga ini sang bulig sa Philippine Coast Guard pati man sa Hong Kong Coast Guard.
Nahibaloan sa kompanya sini nga Seacrest Company, lunsay mga Pinoy ang sakay sang amo nga barko.
Base sa pahayag sang utod sini nga si Hizzle Paguntalan, gina-bully ini kun kaisa sang kaupdanan niya nga chief engineer.
Padayon pa tubtob sa subong ang pagtinguha sang pamilya sang biktima nga makit-an ang presensya sini samtang ginahibalo kun may yara sang foul play sa pagkadula ni Lude Mar Legario.
photo © Palawan Daily News
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
