Roxas City, Capiz – Ginpaguha na sang Commission on Elections(COMELEC) ang ballot face templates sang mga balota nga pagagamiton sa May 13, 2019 midterm election sa pungsod Pilipinas.
Sa lokal nga mga kandidato, talalupangdon nga wala malakip ang pangalan ni former Capiz Governor Victor Tanco Sr. nga nagapadalagan sa pagka-bise gobernador.
Si Tanco ang nahibaloan nga nagtal-os lamang sa orihinal nga kandidato sang PDP-Laban Garcia wing nga si Romualdo Gadong Exmundo Jr. sa pagka-bise gobernador.
Samtang ang iban naman nga mga kaupdanan sini ang nangin independent candidate na gid lamang.
Sa madumdoman nga base sa resolusyon nga ginpaguha sang Comelec, DENIED ukon wala nila ginakilala ang certificate of nomination and acceptance ukon CONA sang mga kandidato sa idalom sang Garcia wing nga ginapamunoan ni Atty Vic-vic Garcia kag sa baylo ni Senador Aquilino “Koko” Pimentel III amo ang ginakabig lihetimo nga tagapirma sang CONA sang mga kandidato sa idalom sang PDP-Laban. Ang nasambitan nga desisyon ang ginpaguha kag napetsahan Disyembre 28, 2018 sa diin ang pirmado naman ni Atty. Maria Norina S. Tangaro Casingal sang Comelec Law Department.
