Gikalipay pag ayo ni Mayor Abel Matildo ang pagtahan sa mga ihalas nga mga armas nga gihuptan sa mga naglihok sa kabukiran lakip ang mga ordinaryong tawo nga naghupot ug armas.
Kagahapong adlawa gihimo ang Mass Surrender & Turn-over of Loose Firearms didto sa GASA, Gymnasium Poblacion, Godod sakop ning probinsya, pormal nga gisugdan ang maong aktibidad 1:00PM kapin kun kulang.
Gitambongan kini sa amahan sa lungsod sa Godod nga si Mayor Abel Matildo, Vice Mayor Ferdinand J. Caboverde, hepe sa maong lungsod nga si P/Insp Clark G. Bacolod, OIC Zamboanga del norte Provincial Director Michael B. Macapagal, anaa usab ang sakop sa 102nd IB, armadong kusog sa pilipinas pinaagi ni capt. Puertas.
Ang mga armas nga gesurender gikan kadto sa 15 ka mga barangay nga kung diin ang lungsod sa Godod, adunay 17 ka barangay. Tungod usab sa padayon nga pag awhag sa mga tinugyanan sa balaod nga itahan ang mga ihalas nga armas, 19 ka nagka lain-laing armas nga mugbo ug tag-as ang nakuha sa PNP Godod sa mga drop box FAs nga gibutanga sa matag lungsod. Samtang 6 kabuok ang gisurender ngadto sa armadong kusog sa pilipinas suma total moabot sa 25 kabuok mga mga armas nga ihalas ang nakuha, sa pagtahan niini nga mga armas wala maila ang mga tag-iya niini tungod kay igo lamang kining gibutang sa BOX FAs.
Mismo ang mga barangay kapitan na ang midala niini para ipresentar sa PNP ug AFP. Hinuon gibutyag ni Capt. Puertas walay problema bisan paman ang mismo tag-iya ang mo dala niini sa ilaha para I surrender, tungod kay ang ilang tuyo mao ang pag awhag nga mo abin na sa gobyerno.
Dako usab ang kalipay ni Mayor Matildo, tungod kay daghan ang misanong sa iyang panawagan para usab kahapsay ug kalinaw sa ilang lungsod sa Godod. Tungod niini dili na matod pa mahadlok ang katawhan nga mag suroy-suroy kun ang tanan nga mga armas de fuego ibalik na ngadto sa gobyerno, butyag pa sa mayor dili lamang pagpalambo ang iyang gitutukan apan lakip ang kalinaw sa iyang area of responsibility.
Naglaum usab si Mayor Matildo nga aduna pa’y laing I tahan nga mga armas gikan sa nagkadaiyang kabaranggayan.
Kini nga pagtahan sa mga armas sa lungsod sa Godod, kini ang unang higayon dinhi sa tibuok probinsya sa Zamboanga del norte para sa 2018.
