Davao City – Gipasidunggan ni Acting Mayor Sebastian “Baste” Duterte ang mga sakop sa Safety and Security Cluster pinaagi sa usa ka “boodle fight” atol sa thanksgiving event human sa malampusong pagsiguro sa kalinaw ug kahapsay sa Kadayawan Festival 2025 niadtong Agosto.
Gipahigayon ang maong kalihokan sa People’s Park, adlaw’ng Biyernes, Setyembre 12, diin gibanabanaang anaa sa kapin 2,000 ka personahe gikan sa nagkadaiyang yunit ang mitambong.
Usa, matod pa, kini ka pahalipay nga selebrasyon alang sa ilang panaghiusa ug paningkamot sa pagpanalipod sa katawhan sa syudad.
Sa iyang mensahe, si Mayor Baste mibutyag nga dako ang iyang pagpasalamat sa tanang miyembro sa cluster alang sa ilang dedikasyon ug walay puas nga pagpanerbisyo.
Giila sab ni Baste ang ilang mahinungdanong papel ug kontribusyon sa kalampusan sa dagkong kalihokan sa syudad ug sa padayon nga pagmintinar sa kalinaw ug kahapsay sa Davao City.
RadyoMaN Kareen Beltran
Facebook Comments
