Mayor Baste, mitubag sa pamahayag nga gipagula sa PRO XI kalabot sa pag-relieve sa 35 PNP personnel

Nakahatag matud pa og kabalaka sa komunidad ang kalit mga desisyon sa pagtangtang sa pwesto sa 35 ka personahe sa Davao City Police Office (DCPO).

Niining bag-uhay lang, gipasabot sa Police Regional Office (PRO) XI nga ang maong lakang nakabase sa rekomendasyon sa Regional Internal Affairs Service 11 (RIAS 11) aron mapahigayon ang “transparency ug accountabililty”.

Apan alang kang Mayor Sebastian Baste Duterte, kadudahan kini kung husto ug makatarunganon ba ang proseso tungod wala gilatid kung unsa ang partisipasyon sa maong mga pulis nga gi-relieve sa pwesto.

Nanawagan ang mayor ngadto sa Department of Interior and Local Government (DILG) o kang Presidente Ferdinand Marcos Jr. kalabot niini nga isyu ug dugang pagpasabot sa saktong rason luyo sa pinakalit nga aksyon. Gani wala niya wad-a ang posibilidad nga pulitika gihapon ang nagpaluyo niini.

Sa katapusan, gibarugan ni Baste nga dili dautan ang pagdeklara og gyera kontra droga aron maprotekhahan ang komunidad batok sa illegal nga binuhatan ug sumala pa nga kini magpadayon aron mapakgang ang drug networks ug mapabilin ang peace and order sa dakbayan.

RadyoMaN Ivy Parido