TACLOBAN CITY – Aminado hi anay Albuera Leyte Chief of Police PCInsp. Jovie Espenido nga hi the late Albuera Mayor Rolando Espinosa ngan an iya anak nga hi Kerwin Espinosa in diri apil ha mga naaresto durante han drug buy-bust operation nga gindumara ha AlbueraLleyte dida han Hulyo 28, 2016.
Pero sumala han mga prosecutors nga an mga naaresto hadto nga adlaw in gintututdlok an mga Espinosa kumo mastermind luyo han illegal drug trade ha Leyte.
Umatinder hi Espenido ha Manila Regional Trial Court o kun RTC para ha kaso kontra kan Kerwin Espinosa nga naatubang hin drug trading ngan illegal possession of firearms and explosives.
Durante han testimonya ni Espenido, sumala ha iya nga lima an naaresto durante han buy-bust operation ha basketball court atubangan han panimalay ni Kerwin.
Han pakianhan kun may kamatuuran ba ini nga testimonya ni Espenido ha kaso ni Espinosa, sumala han mga prosecutor, duha ha lima katawo an naaresto nga gin identify ni Mayor Espinosa ngan ni Kerwin.
Dida han July 28, 2016, nagdumara hin operation an PNP ha Sitio Tinago, Brgy. Binolho ha Albuera Leyte, narikupo han mga otoridad an 200 kagramo han shabu ngan mga pusil. Naaresto gihapon hira Marcelo Adorco, Jose Antepuesto, Jessie Ocarez, Ernesto Dumalat ngan Jeffrey Pesquera.
Sumala kan Kerwin Espinosa, diri iya adton mga nakumpiska nga droga ha ira panimalay.
