TACLOBAN CITY – Naatubang yana ha Ombudsman an Alkalde han Jiabiong, Samar nga hi Mayor Jocelyn Uy-De Jesus hin 6 counts ha pagtalapas han section 3 han Republic Act No. 3019 han Anti-Graft and Corrupt Practices Act tungod han maanomalya nga procurement han Catering Services dida han tuig 2012.
Lakip gihapon ha kaso hi Municipal Budget Officer Arnaldo Morabor, Municipal Treasurer Erra Morabor, Municipal Accountant Rolando Jabeguero ngan tag-iya han Helen’s Catering Services nga hi Helen Labrague.
Base ha annual audit report han Commision On Audit (COA) dida han 2012,nagpagawas an munisipalidad hin P2,617,912.50 para han pagprocure han 32 nga catering service contracts kun diin 16 hini in gin-award ha Helen’s Catering Services.
Napamatud-an han COA nga an mga repondents in illegal nga ginpatuman an pag-procure bisan an naaprobaran nga budget han kontrata han indibidwal nga transakyon in naglapos ha thresholds ha ilarom han R.A 9184 o kun Government Procurement Reform Act.
Basi gihapon han imbistigasyon, waray kompleto nga detalye an mga dukomento sugad han petsa han aktibidad, purchase request, purchase orders, waray petsa ngan reference numbers nga mga disbursement vouchers ngan waray makasumiter hin eligibility documents han supplier.
Ha pareho gihapon nga administrative case, hi Arnaldo, Erra, ngan Jaguero in napamatud-an nga guilty of grave misconduct ngan gin-order nga i-dismiss hira ha serbisyo, ngan hi Arnaldo in napamatud-an liwat nga guilty of serious dishonesty.
