TACLOBAN CITY – “Diri namon panag-iya”, ini an nagin pahayag ni Marabut Samar Mayor Elizabeth Ortillo matapos nga makumpiska han Cebu City PNP an 15 nga armas ha sakob han bag-o nga pinalit nga bus han Local Government han Marabut tikang ha Cebu.
Sumala han alkalde, nahipapausa hiya kun kayano may mga pusil ha sakob han ira bus, diri liwat hiya maaram kun hin-o an nagtatag-iya hini.
Waray daw rason para pumalit an Marabut LGU hin mga pusil.
Gindig-unan naman han alkalde nga inosente an mga nagkadadakop nga nakadto ha sakob han bus nga hira Joel Pedrosa, 45 anyos ngan hi Herman Gagmatan, 31 anyos ngan mga residente ha Marabut, Samar.
Una na nga nai-report han RMN Tacloban nga narikupo han mga kapulisan ha Cebu an 15 nga armas dida han huwebes han nakalabay nga semana.
Nagpapadayon naman an imbistigasyon han mga otoridad agud mabaruan kun kayano may mga armas ha sakob han bus nga gintatag-iyahan han LGU Marabut.
