TACLOBAN CITY – Ginsuspende hin usa ka bulan ngan usa ka adlaw han Office of the Ombudsman hi Santa Fe, Leyte Mayor Oscar Monteza ngan Human Resource Officer Videl Apurillo mahitungod nga hira in guilty ha Simple Neglect of duty.
Ginfile an reklamo han Field Investigation Office (FIO) dida han 2014 pinaagi han fact-finding investigation durante han illegal nga pagamit han ambulansya han munisipalidad nga may plate number SKA 337 kun diin an driver hini nga hi Lito Torre in waray makagsumiter hin trip ticket ha diri rehistrado nga behikulo.
Ha ilarom han imbistigasyon, nag-issue an FIO hin upat nga subpoenas duces tecum nga nakarawat ni Apurillo dida han Mayo 6, 2015, pero bisan ini nakarawat in waray compliance nga ginpadara ha FIO.
Dida han Enero 8, 2016, nagpadara an FIO hin surat kan Monteza agud ipasabot an waray macomply nga subpoenas nga guin-issue ha iya munisipalidad.
Marso 10, 2016, utro nga nagpadara an FIO kan Monteza hin request agud i-sumiter an dukomento.
Mahitungod nga waray la gihapon makakarawat hin reply tikang ha alkalde, in gin-issuehan hiya hin tracer dida han Aug. 18, 2016.
Depensa naman ni Morteza nga waray niya kapanginano an direktiba han FIO mahitungod nga hiya in nahospital hadto nga panahon mahitungod ha heart ailment. Baton naman ni Apurillo nga an mga gin-aaro nga dukomento in nawara dida han bagyo Yolanda.
Ha desisyon han Ombudsman dida han Marso 7, 2018, nga an mga rason ni Mayor Monteza ngan Apurillo in usa nga ground para han administrative disciplinary action ha ilarom han Republic Act 6770.
Dayon naman nga naghatag hin direktiba an Ombudsman ha DILG agud ipatuman an desisyon.
