Davao City- Gikumpirma ni Davao City Mayor Mayor Inday Sara Duterte-Carpio nga mudagan siya sa 2019 election isip alkalde gihapon sa siyudad sa Davao.
Kini iyang gianunsyo atol sa Davao City Chamber of Commerce and Industry, Inc. kun DCCCII Induction sa mga bag-ong officers nga gipahigayon sa SMX Convention, Center, Lanang ning syudad.
Sumala sa batang Duterte, buot pa niya maatiman ang pagkumpleto sa mga proyekto sa dakbayan sama sa high-priority bus ug farm-to-market road system diin gibana-banaang di pa makumpleto sa tuig 2019.
Kini ang unang pagbutyag sa Mayor kabahin sa iyang political plans diin iyang giingnan ang DCCCII nga tugtan siyang mudagan isip mayor gihapon tungod sa nasangpit nga mga rason.
Kahinumduman nga dunay mga hungihong sa milabayng tuig nga mudagan pagka senador ang Mayor apan iya ng giklaro ang iyang political plans atol sa nasangpit nga aktibidad.
RadyoMaN Renz Barabarona
