Davao City – Wala matagbaw ang Southeastern Mindanao Diversified Drivers Operators Cooperative sa trabaho ni Mayor Inday Sara Duterte-Carpio karong tuiga.
Dili pa igo alang sa grupong SEMDDOC ang gipakitang performance ni Mayor Inday Sara sa pagdumala sa siyudad sa Dabaw hilabi na sa pagtabang alang sa kaayohan sa transport sector karong tuiga.
Ug tungod kay wala malipay si SEMDDOC President Maning Duran sa gihimong mga lakang sa inahan sa siyudad batok sa sektor sa transportasyon bagsak nga grado ang gihatag ngadto sa mayor.
Suma ni Duran nga nagsumikad ang ilang paghatag og 4 nga grado sa Mayor tungod matud pa kini sa pag-pang-ipit nga gibuhat sa mayor pinaagi sa sa pagwagtang sa Public Utility Jeepney sa kadalanan.
Ug kung hingpit magsugod na sa operasyon ang bus system program ni Mayor Inday Sara dako matud pa kini og epekto sa panginabuhian sa mga drivers ug mga operators.
Nasayran nga ugmang adlawa gikatakda magpahigayon og State of the City Address kun SOCA si Mayor Inday Sara Duterte-Carpio diin iyang itaho ang mga nahimo ug wala pa mabuhat sa iyang katungdanan karong tuiga.
RadyoMaN Joel Viray
