Davao City-Wala pa gani hingpit gipangkatag sa upat ka lugar sa dakbayan sa Dabaw gitugyan na og bug-at nga hagit ug responsibilidad ang mga sakop sa Special Weapons and Tactics Davao Team kinsa baguhay migradwar gikan sa 15 ka adlaw nga sa Advance Training Course.
Atol sa graduation ceremony, gitahasan ni Davao City Mayor Inday Sara Duterte-Carpio ang 48 ka SWAT Davao Team sa pagbantay sa dakbayan ug sigurohon ang kaluwasan sa mga Dabawenyo gikan sa mga kriminal ug terorista.
Gihagit sa mayora ang SWAT Davao Team nga gamiton ang ilang natun-an sa pagbansay diha sa pagbantay sa seguridad uban sa pagpangandam sa kanunay sa bisan unsang panghitabo sa syudad.
Giingon pa niini, pipila sa atubangon nga hagit nila mao ang tinguha sa uban nga buot mudaot ug mubalos sa dakbayan nga nasuko kang Presidente Rodrigo Duterte nga naligsan sa kampanya kontra droga ug terorismo.
Gihangyo sab sa mayora nga himoon nila ang tanan aron luwas ang mga Dabawenyo ug mag-pabilin nga hapsay ug malinawon ang tibook syudad.
Gi-awhag pa sa opisyal ang mga milangkob sa SWAT Davao Team nga magkinabuhi ug magserbisyo nga matarong aron ipasigarbo sila sa ilang tagsa-tagsa ka pamilya.
Nasayran, ang 48 ka myembro sa SWAT gilangkoban sa pito ka sakop sa Task Force Davao ug 41 ka Pulis ilawom sa DCPO.
Abagahon sa lokal nga kagamhanan ang pagpalit og bag-o, modern ug sophisticated nga kagamitan alang sa maong security force group diin matag usa kanila dunay alokasyon nga 31 ka libo ka pesos.
Kasamang Joel Viray
