Iloilo City- Ginpanginbulahan ni Mayor Jed Patrick Mabilog ang kapulisan sa madinalag-on nga anti-drug operation nga nagresulta sa kamatayon sang number 1 drug lord sa Western Visayas nga si Richard Prevendido kag bata sini nga si Jason Prevendido.
Sa official statement nga ginpaguwa sang alkalde gikan sa Japan kag ginbasa ni City Administrator Atty. Hernando Galvez, ginpasalamatan man ni Mabilog ang mga Ilonggo nga nagbulig sa mga pulis pinaagi sa paghatag sang impormasyon agud matultulan ang ginapanaguan ni Prevendido.
Nagalaum ang Alkalde nga sa pagkapatay ni Prevendido, mahagan-hagan na kon indi man lubos nga madula ang illegal nga druga sa Iloilo ilabi na diri sa siyudad.
Ginpasiguro man sini nga magapadayon ang City Government upod sa PDEA kag ICPO sa mabaskog nga kampanya kontra sa illegal nga druga.
Ginmandu man ni mabilog ang madasig nga pag-release sang 500 mil pesos nga reward money nga ginpangako sang siyudad sa makatudlo kay Prevendido.
