Mambusao, Capiz – Proyekto sang DPWH ang hanging bridge sa Pangpang Norte,Mambusao, Capiz nga naguba samtang nagatabok ang mga nagakompanyar sa patay, ini ang ginpahayag ni Mambusao Mayor Leodegario Labao, jr. Suno pa alkalde, nga ini ang gintukod sang tuig 1968 pa kag indi iya sang munisipyo apang nagahatag gid lamang sila sang kuarta agud nga maparepair sang barangay.
Sa madumduman nga naglab-ot sa kapin 30 ka mga persona ang nahulog sa nasambit nga tulay kag ang iban sini diri gindala sa ospital matapos nag-angkon sang mga pilas sa lawas. Bangud sa kadamuon kag kabug-at sang mga nagatabok nadulaan sang balance kag nautod ang isa ka kable nga gintunaan sang pagtakilid sang hanging bridge.
Ang iban sa mga biktima, naka-inom sang tubig kag nakabatyag sang kahalok kag kakulba. Maswerte naman nga nakatabok una ang patay antes nagtakilid ang nasambit nga tulay. Madasig naman nga nagpatigayon sang rescue operations ang Mambusao MDRRMO, PNP, BFP at PDRRMC agud masalbar ang mga biktima.
Wala sang may napatay sa nasambit nga insidente. Ginapasalig naman ni Labao ang pagpakay-o sa amo nga tulay nga matapos subong nga semana. Magadihon man sang isa ka sulat ang alaklde pakdto sa DPWH kag talatapan ni 2nd District Congressman Fredinel Castro agud mapangitaan sang pondo para makapaubra sang mas mabakod nga tulay sa nasambit nga barangay.
Nagpasalamat man si Mayor Labao bangud wala man sang may ginbawian sang kabuhi sa amo nga insidente. Ginsabat man sini ang tanan nga balayran sa ospital sang mga biktima. Nahibaluan nga masobra sa napulo ang gindala sa ospital kun sa diin nakagwa ang mga ini kag hilway na sa katalagman.
