Davao City – Hugot nga ginamonitor ug ginabadlong sa COVID-19 Enforcement Task Force sa City Government of Tagum, Davao del Norte, ang mga tawong wala nagsunod sa health and safety protocols batok Coronavirus Disease 2019 (COVID-19).
Atol sa gipahigayong Oplan Badlong-Dakop kagahapong adlawa (Hulyo 1, 2021) pipila sa mga violations mao ang wala pagsul-ob og face mask, pag-operate sa fitness gyms, internet cafes, ug beauty salons.
Panawagan ni Tagum City Mayor Allan Rellon sa publiko ilabi na sa Tagumenyos, padayong sundon ang ginapatumang minimum public health standards partikular na ilawom sa Modified Enhanced Community Quarantine (MECQ) tungod sa padayon gihapon ang pagtaas sa COVID-19 cases sa dakbayan.
“Gina-awhag ta mo sa pagsunod sa atong mga balaod aron atong mapakunhod ang ihap sa atong active (COVID-19) cases ug aron kita makalingkawas na niining maong krisis,” panawagan ni Rellon.
Sugod kagahapong adlawa (Hulyo 1, 2021) gipailawom ang lugar sa MECQ ingon man ang entero Davao Region hangtud sa Hulyo 15, 2021.
RadyoMaN Kirby Manzon
