General Santos City–Atol sa subling pagtay-og sa 6.4 magnitude nga linog, gibutyag ni Gensan City Mayor Ronnel Rivera nga gilayon niyang gimando ang suspensyon sa klase sa tanang lebel sa Gensan alang sa gipahigayong assessment sa gambalay sa mga tunghaan sa syudad.
Nagpahigayon usab ug rapid assessment sa tanang gambalay nga gipanag-iyahan sa gobyerno sa dakbayan mao nga gisuspende ang trabaho sa mga anaa sa gobyerno gawas lang sa mga personahe sa CDRRMO, PNP, BFP ug mga anaa sa rescue team ug mga trabahante sa pampublikong hospital.
Apil usab nga gi-inspection ang mga gambalay nga iyaha sa pribadong sector aron nga masayran kung aduna bay mga na-damage sa maong mga gambalay.
Gibutyag usab ni Gensan City Mayor Ronnel Rivera nga bisan siya nakabati na ug kabalaka sa sunod-sunod nga pagtay-og sa pipila ka bahin sa Mindanao.
Aminado ang mayor nga wala pa gani nakarekober ang syudad sa nakalabayng pagtay-og nga nahitabo niadtong October 16, gisundan na usab kini ug laing pagtay-og.
Apan kung ikumpara sa Tulunan mas swerte gihapon ang Gensan gumikan hilabihan ka kusog ang pagtay-og nga nasinatian sa maong lugar ug ubay-ubay sab ang mga nasamdan.
