Mayor sa Masiu, Lanao del Sur, nakalingkawas sa pagpang ambush

 Nakalingkawas sa pagpangambush ang mayor sa lungsod sa Masiu, Lanao del Sur, alas-10:00 kagahapon sa buntag, Dominggo, Nobyembre 10, sa Barangay Gata, lungsod sa Buadisposo Buntong.
  Matud pa ni Colonel Madzganbi Mukaram, director sa Provincial Police Office sa Lanao del Sur, paingon unta sa iyang munisipyo sa Masiu si Mayor Nasser Pangamdaman, Jr., gikan sa Marawi City, dihang nahitabo ang pagpamanhig sa wala mailang mga lalaki nga armado sa tag-as nga kalibre sa armas.

  Samaran sa tiyan ang police escort sa mayor, nga iyaha ra usab kabanay, nga nailang si Staff Sergeant Jabbar Romato Pangandaman, samtang samaran usab ang duha ka mga sibilyang kauban niini nga naa sa nagsunod nga sakyanan nga nailang sila si Jamal Gabriel Pangandaman ug Casanonding Mangandong.
  Apan anaa na sila sa luwas nga kahimtang sa Amai Pakpak Medical Center sa Marawi City.  

Miingon si LtCol. Edgar Allan Villanueva, commander sa 49th Infantry Battalion, Philippine Army, nga paingon unta si Mayor Pangandaman sa munisipyo aron pangunahan ang meeting sa municipal peace and order council (MPOC).  
Ang Masiu ilawom sa area of operation sa 49th IB samtang ang Buadiposo Buntong ilawom sa 82nd IB. Gibana-bana nga anaa sa napulo ka kilometro ang gilay-on sa duha ka mga lungsod.  
Matud pa ni Mukaram nga nagpahigayon na og follow-up operation ang military samtang imbestigasyon ang gihimo sa PNP.  


Gimugna na usab ang special investigation task group (SITG) aron maoy motutok sa maong kaso.
(Divina M. Suson)

Facebook Comments