Sa interview sa DXDC RMN Davao kang PLtCol. Jess Anthony Maghirang, Acting Chief of Police (COP) sa Panabo Police Station, iyahang gisaysay nga subay sa blotter report ni Roger Dias Lavisti, 57 anyos, nga taga Barangay Quezon, Panabo City, Davao del Norte, gialegar niini nga dunay nahitabong pagpanghulga atol sa ilang pag-atubang sa barangay.
“Naa silay summon sa Lupong Tagapamayapa between sa iyahang nakabangi nga pamilya, Cabardo family. Accordingly, ang gi-indicate niya sa iyang blotter nga pag-abot didto sa barangay hall, accordingly naa si kapitan ug si Mayor. Maoy gi-allege niya sa iyang blotter,” sulti ni Maghirang.
Subay sa blotter report, nakuratan matud pa si Lavisti nga sila Barangay Kapitan Dodong Plasabas ug Mayor Jose Relampagos ang nangulo sa summon diin sila giingong gipamalikasan, giakusahan ug gihulga sa alkalde rason sa ilahang kahadlok.
Buot usab matud pa sa complainant nga isaka ang iyahang concern sa Department of the Interior and Local Government (DILG), apan matud matud pa sa alkalde nga siya ang manawag sa maong buhatan.
Gipaningkamutan karon sa DXDC RMN Davao nga ma-reach out si Mayor Relampagos sa numero nga nakabutang sa iyahang Facebook page, apan wala pay tubag ang alkalde.
RadyoMaN Kirby Manzon
