Davao City – Gimando ni Davao City Mayor Sara Duterte-Carpio ang pagtanggal sa mga poster o tarpaulin sa mga politiko nga gibutang sa mga vaccination sites sa syudad sa Davao.
Kini human nga nakaabot kang National Task Force (NTF) against COVID-19 Chief Implementer, Secretary Carlito Galvez Jr. ang reports nga adunay mga vaccination hubs nga adunay ginabutang nga hulagway sa politiko ug daw gipamulitika ang vaccination program sa gobyerno.
Giklaro usab ni Mayor Sara, wala siyay mando nga ibutang ang iyang nawong o sa bisan kinsang politiko sa Davao diin posible kining hinimuan sa mga nagdumala sa vaccination sites.
“Wala ‘mi instruction sa vaccination sites nga ibutang ang amoang nawong o sa bisan kinsa nga politicians diri sa Davao City. Probably, these are initiatives sa mga tao nga nagapadagan sa vaccination sites. We will follow the order of NTF Secretary (Carlito) Galvez (nga tanggalon ang tarpaulins/posters),” sulti sa alkalde.
Kini magsilbing pahimangno niadtong adunay intensyon nga gamiton ang vaccine program sa pamulitika nga hunongon ang maong lakang, inay gamiton ang ilang oras ug resources sa pagtabang sa kampanya sa gobyerno pinaagi sa pag-awhag sa katawhan o sa publiko nga magpabakuna batok Coronavirus Disease 2019 (COVID-19).
RadyoMaN Kirby Manzon
