Davao City – Gipangandaman sa lokal nga panggamhanan ang posebling pagtaas pa sa mga kaso sa coronavirus disease (COVID-19) sa syudad sa Davao.
Matud ni Davao City Mayor Sara Duterte, ilawom sa General Community Quarantine (GCQ) daghang tawong ma-expose ug modaghan usab ang mga establisyementong mamahimong tinubdan sa impeksyon.
“Karon mas nidaghan na ang sources nga pwede kang matakdan, naa diha sa jeep, naa diha sa mall, naa dinha sa tindahan sulod sa mall. Ayaw kaayo mo ka-excited nga manuroy kay ang nakabutang sa Ombinus Guidelines unsa? You can only go out for essential goods and services that is food and medicine and go to the hospital,” matud niini.
Sumala sa Mayor, niadtong ECQ period pa nangandam na ang syudad sa pagbutang og daghang mga isolation facilities, pag-asistir sa permit sa ubang hospital ug pasilidad aron makapahigayon sa COVID-19 testing, pagpa-andam sa upat ka mga pribadong hospital isip back-up nga modawat og COVID-19 patient sa higayong dili na ma-akomodar sa Southern Philippines Medical Center (SPMC).
Ipatuman usab ang house, street ug compound lockdowns sa mga lugar nga daghan ang kaso.
“We still need to be vigilant because there is no medicine, there is no bakuna as of today. Naa gihapon ang sakit diha that’s why we need the new normal, we still need the self protection measures. Importante lang nga dili siya mu-surge og sobra kadagnan nga uncontrollable na siya and dili na siya makaya sa atong healthcare facility and hopefully what we have prepared sa pagkakaron can carry the increasing positive cases,” segun niini.
RadyoMaN Aimee Guinita
