Davao City – Gipaboran ni Davao City Mayor Sara Duterte-Carpio ang rekomendasyon nga i-door-to-door ang community pantry products sa rason aron malikayan ang dasok sa tawo sa usa ka lugar ug malikayan ang risgo sa Coronavirus Disease 2019 (COVID-19).
Matud ni Mayor Sara, pabor siya kung malahutay usab sa resources sa mga organizers sa community pantry, apan matud sa alkalde nga kinahanglan gihapong i-obserba ang minimum public health standards batok COVID-19 labi na panahon sa pagtunol niini.
“Kung kayanon na sa resources sa magpahigayon og community pantry, mas maayo nga ingon ana ang ilang buhaton. Ang kinahanglan lang nato i-remind sa ilaha is to make sure nga they follow the minimum public health standadrs sa pag deliver nila sa donation, pagkaon or unsang klase nga items,” saysay sa alkalde.
Gibutyag usab ni Mayor Sara nga gipaundang kagahapong adlawa (March 26, 2021) sa awtoridad ang usa ka community pantry sa Quimpo Boulevard, Davao City, human wala naplastar ang sistema sa han-ay sa pagdagsa sa tao.
RadyoMaN Kirby Manzon
