Mayor Uy gisigurong mahatagan og hustisya ang krimen sa Tagum

Davao City – Gipaniguro sa Local Government Unit (LGU) Tagum City sa Davao del Norte nga makab-ot ang hustisya sa pamilya sa mga biktima nga gipatay sa miaging bulan, Abril 2023.

Sa interbyu sa DXDC RMN Davao kang Tagum City Mayor Rey Uy sa programang Straight to the Point uban si RadyoMaN Bernard Pantallon, gisulti niini nga aduna nay mga kalamboan sa kaso sa pagpatay sa 9 anyos ug 18 anyos nga babae sa managlahing petsa ug lugar sa syudad.

“Kadtong 9 years old (victim), na-identify na man ang suspek. So, regular filing lang ‘to until nga (ang) warrant of arrest mugawas. Ang (sa) kadtong 18 anyos, mao ‘toy crime of passion,” sulti ni Uy.

Gidugang ni Uy nga sa kaso sa 18 anyos, gina-identify na lang ang responsable, diin posibleng kaila ra sa kaubanang masahista sa biktima ang nagbuhat sa krimen.

Samtang, gisulti sa alkalde nga buot niining matutokan sa hepe sa Tagum City Police Office ang kampanya batok sa iligal nga droga ug uban pang kriminalidad sa dakbayan.

RadyoMaN Kirby Manzon