Nipada na ug suwat ang Cebu Provincial Police Office (CPPO) ngadto sa PNP Crime Laboratory -7 aron ipaubos sa paraffin test ang duha ka mga kamot ni Daanbantayan Vicente Loot , subay sa aksidenteng pagkaigo niini sa armas .
Kabahin kini sa nagpadayong imbistigasyon sa kapolisan sa accidental firing nga nahitabo ni Loot aron pagtino kung siya ba gyud ang nakakablit sa armas o adunay foul play sa pangangkon nga aksidente lang ang pagbuto sa armas ug naigo ang paa sa mayor.
Matud sa hepe sa CPPO nga si Sr. Supt. Manuel Abrugena nailhan na hinoon nila kung kinsa ang tag-iya sa armas nga mao ang civilian security sa mayor nga nadestino sa General Services Office sa munisipyo .
Apan wa pa masayri unsay kalibri niini tungod kay hangtud karon wa pa kini makaplagi tungod kay giingong nalabay kini human sa hitabo.
Sutaon usab sa kapolisan sa imbistigasyon kung lisensiyado o dili ang maong armas.
