MDRRMO: Retrieval operation sa Pantukan lanslide giundang na

Davao City – Human sa kapin usa ka semana nga retrieval operations, giundang na sa Municipal Disaster Risk Reduction and Management Office (MDRRMO) sa Pantukan ang aktibidad sa landslide area partikular na sa Sitio Palo, Purok Ecoland, Barangay Napnapan, Pantukan, Davao de Oro nga nahitabo niadtong Marso 8, 2022

Sa interbyu sa DXDC RMN Davao kang Nick Bryan Patalinghug, head sa Rescue Team, gibutyag niini nga bisan og gisuspende na sa Local Government Unit (LGU) ang operasyon, padayon gihapon ang pagpaningkamot sa mga minero nga makita ang ilang kauban nga nagpabiling missing nga si Dodoy Elipe.

“Kagahapon (Marso 14, 2022) opisyal nato gi-terminate ang retrieval (operation) kay supposedly three days ra man gyud terminate na. Pero ang mga taga didto nga mga miners pud, kauban nila maoy nagpadayon,” sulti ni Patalinghug.

Matud ni Patalinghug, wala nakita sa rescue team ang nahibiling minero sa lugar nga gituhoang natabunan sa landslide, diin dako usab ang area kung asa nahitabo ang pagdahili sa yuta.

Anaa usab karon sa area ang kabanay o tagtungod sa nahibiling missing nga biktima, rason nga gipadayon gihapon ang retrieval operation sa pagpanguna sa operator sa minahan ug mga kaubanang minero sa mga biktima.

RadyoMaN Kirby Manzon