Gindeklarar sang Department of Health ang Measles outbreak sa Western Visayas, kaupod sa National Capital Region, Central Luzon, Region 4-A kag Central Visayas.
Diri sa rehiyon 6, ginpahayag ni Dr. Mary Jane Juanico, Medical Coordinator sang DOH-6 Child health Program nga as of January 26, 2019, may yara na sang 166 ka kaso sang tipdas nga nalista ang ila talatapan kag 3 ang suspected death cases.
Ginpahayag ni Dr. Juanico nga ini bangud sa manubo nga turn-out sang ila ginpatigayon nga immunization drive sang 2018.
Base sa data sang DOH 6, naglab-ot lamang sa 61% ang nabakunahan nga mga kabataan nga naga-edad 9 ka bulan nga mas manubo ikumparar sang 2017 nga may 67%.
Suno kay Juanico nga pila ka kabangdanan sang manubo nga turn out sang immunization sang anti-measles amo ang kahangawa sang mga iloy nga mahalitan ang ila bata bangud sa isyu sang dengvaxia.
