Davao City – Hugot nga ginapatuman sa kapulisan sa Bansalan, Davao del Sur ang guidelines ug protocols ilawom sa Modified Enhanced Community Quarantine (MECQ) ug pagpatuman og granular lockdowns.
Kini human giaprubahan sa Regional Inter-Agency Task Force (RIATF)-XI ang maong quarantine request sa Bansalan Local Government Unit (LGU) epektibo sugod niadtong September 13 hangtud September 30, 2021.
Sa interbyu sa DXDC RMN Davao kang Police Major Peter Glenn Ipong, hepe sa Bansalan Municipal Police Station (MPS), gibutyag niini nga istrikto nilang ginapatuman ang curfew ug liquor ban diin 24-hour ang liquor ban sa siyam (9) ka barangays sa Bansalan nga anaa sa high-risk sa Coronavirus Disease 2019 (COVID-19) diin adunay gimontar nga Barangay checkpoints sa maong mga lugar.
“Kadtong mga barangay captains, among gitabangan to implement gyud ni atong mga protocols labaw na ni sa atong curfew, sa atong liquor ban. Naa ‘tay 24 hours liquor sa kadtong mga high-risk barangays nga identified,” segun ni Ipong.
Panawagan sa police official sa ilang mga residente nga padayong sundon ang ginapatumang minimum public health standards batok COVID-19 sama sa pagsuot og face mask, social distancing ug paghugas og kamot aron nga malikayan ang takod sa virus.
RadyoMaN Kirby Manzon
